ಬೆಳಗಾವಿ ಜಿಲ್ಲೆ ರಾಮದುರ್ಗ ಪಟ್ಟಣದ ತೇರ್ ಬಜಾರ (ಯಾನಮಪೇಟೆ) ದಲ್ಲಿ ಕಳೆದ ಸುಮಾರು 20 ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಿರುವ ಟೌನ್ ಅಂಚೆ ಕಚೇರಿಯನ್ನು ಪ್ರಧಾನ ಅಂಚೆ ಕಚೇರಿಗೆ ವಿಲೀನಗೊಳಿಸುವ ಪ್ರಸ್ತಾವನೆಗೆ ವಿರೋಧ ವ್ಯಕ್ತವಾಗಿದ್ದು, ಸಾರ್ವಜನಿಕರು ಹಾಗೂ ವಿಜಯ್ ಸೇನಾ ಸಮಿತಿ ಯ ನೇತೃತ್ವದಲ್ಲಿ ಅನಿರ್ದಿಷ್ಟಾವಧಿ ಹೋರಾಟ ಆರಂಭಗೊಂಡಿದೆ.
ಏಪ್ರಿಲ್ 16 ರಂದು ಬೆಳಿಗ್ಗೆಯಿಂದ ರಾಮದುರ್ಗ ಪ್ರಧಾನ ಅಂಚೆ ಕಚೇರಿಯ ಎದುರು ನಡೆದ ಪ್ರತಿಭಟನೆಯಲ್ಲಿ ನೂರಾರು ಜನರು ಭಾಗವಹಿಸಿ ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದರು. ವಿಜಯ ಸೇನಾ ಸಮಿತಿಯ ಮುಖಂಡ ವಿಜಯ ನಾಯಕ ಅವರು ಈ ಹೋರಾಟಕ್ಕೆ ನೇತೃತ್ವ ನೀಡಿದ್ದು, ಯಾನಮಪೇಟೆಯ ಅಂಚೆ ಕಚೇರಿ ಸಾರ್ವಜನಿಕರ ಜೀವನಾಡಿಯಂತಿದೆ ಎಂದು ಅಭಿಪ್ರಾಯಪಟ್ಟರು.
ಈ ಅಂಚೆ ಕಚೇರಿಯು ಹಿರಿಯ ನಾಗರಿಕರು, ರೈತರು, ವಿಕಲಚೇತನರು ಹಾಗೂ ವಿದ್ಯಾರ್ಥಿಗಳಿಗೆ ಬಹುಮುಖ್ಯ ಸೇವೆಗಳನ್ನು ನೀಡುತ್ತಿದ್ದು, ವೃದ್ಧಾಪ್ಯ ವೇತನ, ಪಿಂಚಣಿ, ಉಳಿತಾಯ ಯೋಜನೆಗಳು ಸೇರಿದಂತೆ ಹಲವು ಸೇವೆಗಳಿಗಾಗಿ ಸ್ಥಳೀಯರು ಇದರ ಮೇಲೆ ಅವಲಂಬಿತರಾಗಿದ್ದಾರೆ.
ಯಾನಮಪೇಟೆ ಮಾತ್ರವಲ್ಲದೆ ಸುತ್ತಮುತ್ತಲಿನ ಗ್ರಾಮಗಳಾದ ದೊಡಮಂಗಡಿ, ಘಟಕನೂರ, ಚಿಚಖಂಡಿ, ರಂಕಲಕೊಪ್ಪ, ತೊರಗಲ್ ತಾಂಡಾ ಸೇರಿದಂತೆ ಹಲವು ಪ್ರದೇಶಗಳ ಜನರು ಈ ಕಚೇರಿಯನ್ನು ಬಳಸುತ್ತಿದ್ದಾರೆ.
ಈ ಕಚೇರಿಯನ್ನು ವಿಲೀನಗೊಳಿಸಿದರೆ ಸಾರ್ವಜನಿಕರಿಗೆ ಭಾರೀ ತೊಂದರೆ ಉಂಟಾಗಲಿದೆ ಎಂದು ವಿಜಯ ನಾಯಕ ಅವರು ಎಚ್ಚರಿಸಿದರು.
ಸಣ್ಣ ಮೊತ್ತದ RD ಖಾತೆಗಳಿಗೆ ಹಣ ತುಂಬಲು ಜನರು ಕನಿಷ್ಠ 100ರಿಂದ 200 ರೂಪಾಯಿ ವೆಚ್ಚದಲ್ಲಿ ಆಟೋ ಪ್ರಯಾಣ ಮಾಡಬೇಕಾದ ಪರಿಸ್ಥಿತಿ ಉಂಟಾಗುತ್ತದೆ.
ಯಾನಮಪೇಟೆಯಿಂದ ಸುಮಾರು 1.5 ಕಿಲೋಮೀಟರ್ ದೂರದ ಪ್ರಧಾನ ಅಂಚೆ ಕಚೇರಿಗೆ ಬಿಸಿಲಿನಲ್ಲಿ ನಡೆದುಕೊಂಡು ಹೋಗಬೇಕಾಗುತ್ತದೆ ಎಂದು ಅವರು ವಿವರಿಸಿದರು.
ಪ್ರಧಾನ ಅಂಚೆ ಕಚೇರಿಯಲ್ಲಿ ಈಗಾಗಲೇ ಹೆಚ್ಚಿನ ಜನಸಂದಣಿ ಇರುವುದರಿಂದ, ಹೊಸದಾಗಿ ಯಾನಮಪೇಟೆಯ ಖಾತೆದಾರರು ಸೇರಿಕೊಂಡರೆ ಸೇವೆಯಲ್ಲಿ ವಿಳಂಬವಾಗುವ ಸಾಧ್ಯತೆ ಇದೆ.
ಇದರಿಂದ ಸಾರ್ವಜನಿಕರು ಹಲವಾರು ಬಾರಿ ಅಲೆದಾಡುವ ಪರಿಸ್ಥಿತಿ ನಿರ್ಮಾಣವಾಗಬಹುದು ಎಂದು ಪ್ರತಿಭಟನಾಕಾರರು ಆತಂಕ ವ್ಯಕ್ತಪಡಿಸಿದರು.
ಗದಗ ಜಿಲ್ಲೆಯ ಬೆಟಗೇರಿ ಹಾಗೂ ಬಾಗಲಕೋಟೆ ಜಿಲ್ಲೆಯ ಬನಹಟ್ಟಿ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಇದೇ ರೀತಿಯ ವಿಲೀನ ಪ್ರಸ್ತಾಪವನ್ನು ಹೋರಾಟದ ಮೂಲಕ ಹಿಂತೆಗೆದುಕೊಳ್ಳಲಾಗಿದೆ. ಹಾಗಿದ್ದರೆ ನಮಗೆ ಮಾತ್ರ ಅನ್ಯಾಯ ಏಕೆ ಎಂಬ ಪ್ರಶ್ನೆಯನ್ನು ವಿಜಯ ನಾಯಕ ಅವರು ಎತ್ತಿದರು.
“ಪ್ರಜಾಪ್ರಭುತ್ವದಲ್ಲಿ ಜನಹಿತವೇ ಮುಖ್ಯ. ಜನರಿಗೆ ಅನುಕೂಲವಾಗುವ ಸೇವೆಗಳನ್ನು ತೆಗೆದುಹಾಕುವುದು ಸರಿಯಲ್ಲ. ಸರ್ಕಾರ ತಕ್ಷಣವೇ ಈ ನಿರ್ಧಾರವನ್ನು ಹಿಂತೆಗೆದು ಯಾನಮಪೇಟೆಯ ಅಂಚೆ ಕಚೇರಿಯನ್ನು ಯಥಾಸ್ಥಿತಿಯಲ್ಲಿ ಮುಂದುವರಿಸಬೇಕು” ಎಂದು ಅವರು ಆಗ್ರಹಿಸಿದರು.
ಸಾರ್ವಜನಿಕರ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟು ತಕ್ಷಣವೇ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂಬ ಒತ್ತಾಯದೊಂದಿಗೆ ಹೋರಾಟ ಮುಂದುವರಿಯುತ್ತಿದೆ.
ಸೇವೆಗೆ ಅಂಚೆ ಕಚೇರಿ ತೆಗೆಯೋದು ಸರ್ಕಾರದ ಕೆಲಸ
ಆ ಸೇವೆ ಜನರಿಗೆ ತಲುಪೋದನ್ನು ನಿಲ್ಲಿಸೋದು ಕೂಡ ಅದೇ ಸರ್ಕಾರದ ‘ಪ್ರಗತಿ’!
₹100 RD ಕಟ್ಟೋಕೆ ₹200 ಆಟೋ ಖರ್ಚು ಮಾಡ್ಬೇಕಾದರೆ,
ಇದು ‘ಸೇವಿಂಗ್ ಸ್ಕೀಮ್’ ಅಲ್ಲ… ನೇರವಾಗಿ ‘ನಷ್ಟ ಯೋಜನೆ’!
20 ವರ್ಷ ಜನರ ಜೊತೆ ಇದ್ದ ಕಚೇರಿ ಒಂದು ದಿನದಲ್ಲಿ ‘ಅನಾವಶ್ಯಕ’ ಆಗಿಬಿಟ್ಟರೆ,
ಹಾಗಾದರೆ ಜನರ ಅಗತ್ಯವನ್ನೇ ಯಾರು ಅಳೆಯುತ್ತಿದ್ದಾರೆ?
‘ಹಿರಿಯರಿಗೆ ಸೌಲಭ್ಯ’ ಅಂತ ಭಾಷಣ ಆದ್ರೆ ನಿಜ ಜೀವನದಲ್ಲಿ 1.5 ಕಿಮೀ ನಡೆದು ಬರೋದು ಪರೀಕ್ಷೆ!
ಪ್ರಧಾನ ಅಂಚೆ ಕಚೇರಿಯಲ್ಲಿ ಈಗಲೇ ಗದ್ದಲ. ಅದಕ್ಕೆ ಇನ್ನೂ ಜನ ಸೇರಿಸಿ, ‘ಸೇವೆ ವೇಗವಾಗಿ ಸಿಗುತ್ತದೆ’ ಅನ್ನೋದು ಯಾವ ಲೆಕ್ಕ?
ಬೆಟಗೇರಿ, ಬನಹಟ್ಟಿ ಕಡೆ ಹೋರಾಟಕ್ಕೆ ಫಲ ಸಿಕ್ಕಿದೆ…
ಇಲ್ಲಿ ಹೋರಾಟ ಮಾಡ್ತಿದ್ರೆ —
‘ನಿಮಗೆ ಮಾತ್ರ ಕಷ್ಟ’ ಅನ್ನೋ ಹೊಸ ನೀತಿ?
ಪ್ರಜಾಪ್ರಭುತ್ವದಲ್ಲಿ ಜನರ ಮಾತು ಕೇಳ್ಬೇಕು… ಆದ್ರೆ ಇಲ್ಲಿ ಜನರು ಕೂಗ್ತಿದ್ರೂ,
ಫೈಲ್ಗಳು ಮಾತ್ರ ಮೌನವಾಗಿವೆ!
ಬೆಳಗಾವಿ ಸನ್ಮಾನ್ಯ ಸಂಸದರೇ ಜಗದೀಶ್ ಶೆಟ್ಟರ ಅವರೇ ದಯವಿಟ್ಟು ಕೇಳಿಸಿಕೊಳ್ಳಿ. ರಾಮದುರ್ಗ ಪಟ್ಟಣದ ಯಾನಮಪೇಟೆಯ ಅಂಚೆ ಇಲಾಖೆ ವಿಲೀನೀಕರಣ ಆಗಲು ಬಿಡಬೇಡಿ. ಇದರಿಂದ ಜನಸಾಮಾನ್ಯರಿಗೆ ಸಾಕಷ್ಟು ಪ್ರಮಾಣದಲ್ಲಿ ಅನಾನುಕೂಲವಾಗುತ್ತದೆ. ಜನಹಿತಾಸಕ್ತಿಗಾಗಿ ಅಂಚೆ ಇಲಾಖೆಯ ಅಧಿಕಾರಿಗಳಿಗೆ ಸಲಹೆ ಸೂಚನೆ ನೀಡಿ.
About The Author
